Dt. 31. 12. 2023 (Kum ralni ) Pathianni tuka ka Sermon

PHURRIT CHHAWKTU ISUA / PHURRIT A BO KALVARY AH

“Nangni  thawk rim leh  phurrit  phur zawng  zawng te  u, ka  hnen ah  Io  kal  ula,  keiman  ka chawlh tir ang che u.  Ka  nghawngkawl bat  ula,  ka  hnen ah  zir  rawh  u;  thuhnuairawlh leh  rilru a in ngaitlawm tak  ka  nih hi:  tichuan, in thlarau tan chawlhna in hmu ang.” (Matthaia 11:28-29).

Lal Isua chu khawvela a lenlai khan amah mamawh tuten an pana, natna tinreng nei ten an pan in a lo tidam a ni, mi kawchhunga ramhuai lutte a hnawt chhuak a, kebaite, zengte, mitdelte, hmeichhe thiputte a tidama, hengte hian an ritphurh chhawk turin Isua an pana, ah rilru, an taksa, an thlarau natna, an ritphurhte a Io chhawk a, a lo tidam a ni, mithi te a kai thova, chhiahkhawntu hlepruk ching thleng in, thinlunga phurhrit neite pawhin an pana, alo puia, alo chhawk a ni.

Hengte hian engvangin nge Isua an pan kan tih chuan, an mamawh em vang a ni. An natna te tidam turin, an phurrit chhawk turin an pan a ni. An va tifuh chiang em aw!

Vawiin niah hian Lal Isua mamawhna i nei ve em, ritphurh i nei em? chutiang a nih chuan Isua hnen pan mai rawh. I tan a inhawng renga puih che a chak asin. Buaina leh lungngaihna chhumpui pawh a hnenah chuan a kiang zel asin. ‘Ka hnenah lokal rawh u, keiman ka chawlhtir ang che u’ tiin a hmangaihna aw nem in nitin min sawm reng thin asin.

Engtin nge harsatna karah nun hlut zia kan hriat theih ang? Kan phurrit hi kan phurh ang ?

Harsatna kan tawh a in anglo ang bawkin kan harsatna tawh dan pawh a dang thin. Mahse, keimahni tawka harsatna nei vek, phurrit phur vek kan ni. Hei hi hringnun a ni, harsatna tawklo in a awm theih loh, “Harsatna tawklo, rawngbawltu awm maw?” tih a nih kha. Kan nunah harsatna alo thleng a, alo la thleng zel dawn… ruihhlo vang te, ngaihzawng vang te, chhungkua vang te in… kan nun hi rit kan ti thin ani tiru? ‘ka tuar thei tawhlo, ka chhe vek tawh, beisei ka nei tawhlo’ kan ti thin em? Kan status ah te hian hrehawm kan tih thu kan va sawi nasa thin tak emmm? Kha harsatna kha a nasa tual tual niin kan hria a, rit kan ti telh telh a, mi tam tak phei chu beidawngin an intihlum thin. Anih loh paw’n kha harsatna lak atang khan tal chhuak thei tawhlo niin kan in hria a, kan nun hi chhe vek tawh niin kan ngai a, a tawp ah chuan harsatna in min hneh hlen zui mai thin.

Hei tunah hian thil pakhat pulpit tuino  ka keng a, a ritlo a, ka zo nelh nelh khawp mai.  Mahse, heti hian keng reng ta ila, darkar khat hnu ah enge lo thleng ang ? A tir a zang ka tih em em kha alo rit em em tawh dawn a ni. Ka thil ken hi a a rit telh telh tihna ani em? Nilo ! ka thil ken hi ka ken tirh a a rih zawng ang tho kha ala ni, mahse, engvangin nge rit ka tih tak em em si? Thil dang vak a nilo, ken dan ngai renga ka ken mai vang zawk a ni. He tiang ang hi kan harsatna tawh dan ani tlangpui a, chuti anih chuan engvangin nge ban kham chung chungin ka ken? Engvang nge ka dah thlak mai loh?  Ka dah thla thei hrihlo anih paw’n engvang nge ka ding/vei  zawng a ka ken dan ka sawn mai loh? Heti zawng te hian ken dan han thlak kual ila, anih loh paw’n dah tha daih ila…ban kham ngawih ngawih chu ka pumpelh mai tur a ni si a. Ka ken ngai a ka ken reng chuan a rit tulh tulh ang a, ka phurrit chu a nihna ang ang a, ka phurreng chuan a rit ka ti tulh tulh dawn ani tihna anih chu.

         

Engtin nge kan Bible chang chhiar ah khan kan hmuh kha?  “Nangni thawkrim leh phurrit phur zawng zawng te u, ka hnenah lo kal ula, keiman ka lo chawlh tir ang che u…engmah phurh a ngailo, tikhan hahdam takin awm ula, engmah phur tawh suh u….a tilo, ka nghawngkawl hi bat rawh u’ ati. Pathian hian harsatna tawk theilo a min siam a tumlo, kan hringnun zin kawng hi National Highway, four lane hlira min thlak sak a tumlo,  A chang chuan fur laia Tuipui kal ang kan ni anga, kawng laka han tan phat phat tum te, midangin min nem chhuahpui atul hial chang te pawh a awm ang, mahse enge pawi? Berh lei luai leh hah hnep pawn awm ila, Tuipui khua kan thlen theih phawt chuan kan tum kan hlen tihna ani mai lawmi? Khua kan luh hnu ah kan in silfai anga, kan awm hahdam leh anga, nuamsa leh fai taka thleng te nen khan kan in ang leh reng, Tuipui khua thleng theuh theuh!

Harsatna kan tawh hi Pathian in a phal, mahse, harsatna dawnsawn dan tur erawh min zirtir a ni, nghawngkawl thar min pek a tum a, phurh dan chi danga phur turin min ti mai zawk a ni. Harsatna ti harsa-tu chu I harsatna kha anilo, nangmah zawk kha ani. Kan hrethiam em?

Tum khat chu Puithiam pahnih hi an zin dun a, lui pakhat an thlen chuan nula pakhat hi an hmu a, lui a daikai ngam loh avangin nula chuan tanpuitu alo nghak chawt mai ani. Chutah, puithiam pakhat chuan eng khaw sawi set set lovin a paw lawk a, lui kam leh lam chu a kaipui ta mai a, a thianpa erawh chuan ngawi rengin a rawn zui a…tichuan, an zin kawng chu an chhunzawm dun leh ta a. Mahse, a khat tawk hian a thianpa zawk chuan, “Puithiam te chuan nula kan khawih thianglo a sin mawle” hi a rawn tileh thin a, atawp ah chuan Puithiam pakhat chuan, “Thianpa, ka nula puak kha kei chuan luikam lehlam ka dah daih tawh a,  nang zawk hian tun thlengin i la paw zawk a nih hi” ati a. Ngaihtuah zui a ngai khawp mai.

Tin, kan harsatna tawh ai hian kan Pathian hi a lian zawk. Thlipui leh tui fawn in a len phar lawp lawp Lawnga chuang te khan an harsatna tawh kha an hmu lian em em a, thihpui tham niin an hria a, an mangang a ni. Mahse, an aia lian zawk Lal Isua a awm tih an hre lova, Lal Isua a rawn dinchhuah meuh kha chuan thlipui leh tuifawn te pawh an awm hle hle  anih kha ti rawh u.

I nun ah khan harsatna lian tak I hmachhawn mek ani mai thei, anih loh paw’n ila hmachhawn dawn chauh ani mahna,…harsatna cho vang nilovin hei hi hringnun ani tih pawm la ka duh a ni. Harsatna eng anga lian pawh tawk mahla, I Pathian biak kha alian zawk, eng anga nasa pawh nimahse, I nun kha a hlu zawk. Hringnun hi a fair-lo tih chang inei ve thin em? Harsatna tawk nasa bik, vanduai bik niin I in hre thin em? Chutiang mi nia I inhria anih chuan heti zawng hian lo ngaihtuah ve teh. Pathian hian i chak zia a hria a, i theihna a hmu a, midang te aia nasa Harsatna phur thei niin a ngai che tihna a nih chu…a ring tawk che ani. Kha harsatna kha Hringnun hlut zia rawn remind tu che ani a, i in ngaihlu lutuk tur vengtu pawh a ni. I paltlang anih phawt chuan khatiang harsatna tawk ve te tan Pathian aiawh a anmahni pui thei tu, Qualified Christian ini tihna ani ava ropui em…. Lalpa chu fakin awm rawhse.

Sermon pakhat ka ngaihthlak ah chuan pastor in chhungkaw pakhat chanchin a sawi a, “An chhungkua an tluang em em a. An in leh lo a tha a, sum leh pai ah harsatna an nei lova, an fate lah ni se an zirna ah an tluang em em vek a…  Chhungkaw nu ber chu a mangang ta a… Tichuan thingthi in Pathian hnenah, ‘Eng vangin nge min kalsan?’ tiin a tap ta a”.a ti. Mite chuan harsatna, phurrit hi Lal Isua panna kailawn ani a, harsatna atang hian Pathian hmel a lang thin ani tih an hria a. Harsatna tawk ve tlaklo ah Pathian in a ngai niin an in hria a, hrehawm an ti ngawih ngawih zawk a sin. Nang leh kei hi enge kan dinhmun ve le !!? Kan harsatna tawh chhe te mai ah pawh hian Pathian chu kan dem thin anih kha ti raw!!

Kan nun ah harsatna a lo thlen in beidawng mai lovin Pathian in kan tawrhna te hi min phalsak a, kan zawh loh tur kross chu min put tir ngai lo tih i hre thar leh ang u. Sap thufing pakhat chuan “Tawrhnain lunghlu a siam thin” tiin a sawi a, a dik hlein ka hria. Kan chhungril a kan thiamna te, kan talent leh kan tangkaina te rawn lang chhuak turin kan tawrh a tul thin.

“Lalpa, kan phur ni tina min phurhsaktu, Min chhandamtu Pathian chu fak in awm  rawh  se.  Pathian chu kan tan chhanhimtu Pathian a ni; Thihna ata chhuahnate chu Lalpa JEHOVA ta a ni bawk.” (Sam 68:19-20). 

’Lal Isua hnenah, ka thlen ngei ang ka phurrit zawng chu, ka tan a rit lua he ka sual phurh hi,  Isua chauh  min puih  theitu   a ni.”

Phurrit a bo ta Kalvary ah. Kan ritphurh zawng zawng te Isuan kalvary ah min hlen sak ta. A ke bul ah kan phurrit te i hlan ang u.

Lalpan a thu malsawm rawhse.